Жорий йилнинг 15 апрель куни “Бир миллион дарахт” акцияси Тошкент вилоятининг Бўстонлиқ туманида жойлашган Қоронқул қишлоғи ҳудудида давом эттирилди.

Йўл бўйидаги 2,0 гектар боғ ер майдонига 300 дона дарахт ва бута кўчатлари (100 та ясин, 100 та қоғоз, 50 та қайрағоч ва 50 та арча) экилди.

Акция “Юксалиш” умуммиллий ҳаракати, Туризм ва маданий мерос вазирлиги, “Чорвоқ” туристик-рекреацион зонаси дирекцияси ДУК, Ўзбекистондаги Huawei компанияси билан ҳамкорликда ташкил этилди. Шунингдек, тадбирда бир нечта нодавлат нотижорат ташкилотлари (“Индиго” ННТ, “Меҳр-оқибат” ННТ, “Агроинновация” ННТ, Волонтёрлар ассоциацияси) вакиллари ҳам иштирок этиб, кўкаламзорлаштириш ишларига ҳисса қўшди.

Президент Шавкат Мирзиёев 2021 йил ноябрда эълон қилган “Яшил макон” умуммиллий лойиҳаси доирасида йилига 200 млн туп дарахт ва бута кўчатларини экиш, шу орқали яшил майдонларни кўпайтириш режалаштирилган эди. Бунга мувофиқ, юртимиз бўйлаб кузда 85 млн дона кўчат ўтқазилди, бу йилги баҳор мавсумида эса 125 млн туп ниҳол экиш кўзда тутилган. Ушбу савобли ишда кўплаб ташкилотлар, маҳаллалар, умуман, кенг жамоатчилик жонбозлик кўрсатмоқда. “Юксалиш” умуммиллий ҳаракати ҳам давлат раҳбари ташаббусини қўллаб-қувватлаш мақсадида барча ҳудудларда “Бир миллион дарахт” акциясини ташкил қилиб келмоқда. Ўтган йилнинг кузида Қорақалпоғистон Республикаси, Тошкент шаҳри, Хоразм, Сурхондарё, Фарғона, Наманган ва Қашқадарё вилоятларида 25 мингга яқин дарахт кўчатлари ўтқазилди. Қайд этиш керак, бу жараёнга хорижий компаниялар ва халқаро ташкилотлар ҳам жалб қилинмоқда. Жумладан, 2021 йилда “Юксалиш” умуммиллий ҳаракати Ўзбекистондаги Huawei компанияси билан меморандум имзолади, унга мувофиқ компания ноябрь—декабрь ойларида пойтахтимиздаги Болалар миллий тиббиёт маркази, “Дўстлик” боғи ҳудудига ниҳоллар етказиб берди ва етук дарахтларни зараркунандалардан даволашга қаратилган эко-тадбирни қўллаб-қувватлади. Ушбу тадбирлар натижасида ҳар икки ҳудудга 500 тупга яқин бута ва дарахт кўчатлари экилди.

Акция иштирокчилари бугун Қоронқулда барпо этилган яшил майдон келгусида қишлоқни янада сўлим, обод бўлишига ҳисса қўшишига умид билдиришди. Экилган кўчатларни парваришлаш, ҳудудни обод сақлаш масъулиятини эса Бўстонлиқ тумани ҳокимлиги ўз зиммасига олди.

Ўзбекистонда бугунги ва келгусидаги экологик вазият инобатга олиниб, дарахт экиш давлат сиёсати даражасига кўтарилди. Бу борада “Яшил макон” умуммиллий лойиҳаси бир йиллик тадбир эмаслиги, унинг доирасида келгуси беш йилда 1 млрд туп дарахт кўчатини экиш мақсад қилингани таъкидланди.

“Юксалиш” умуммиллий ҳаракати матбуот хизмати