Нурота туманидаги «Чашма» зиёратгоҳида
Навоий вилоят ҳокимлиги, вилоят Туризм ва маданий мерос бош бошқармаси, вилоят Маданият бошқармаси, Ҳунармандлар уюшмаси вилоят бошқармаси, Нурота туман ҳокимлиги ва бошқа бир қатор ташкилотлар ҳамкорлигида Нурота туманидаги «Чашма» зиёратгоҳида "Сўзана ва кашта" миллий ҳунармандчилик санъати фестивали бўлиб ўтди.
Мазкур фестивал Ўзбекистон Республикаси Президентининг 2022 йил 30 апрелдаги “Ички туризм хизматларини диверсификация қилишга оид қўшимча чора-тадбирлар тўғрисида”ги ПҚ-232-сонли қарорига мувофиқ “Ўзбекистон бўйлаб саёҳат қил!” дастури доирасида саёҳатларни амалга ошириш орқали сайёҳлар оқимини ошириш, вилоятларнинг туризм салоҳиятини тарғиб қилиш, шунингдек туризм мавсуми давомида сайёҳларнинг ҳамда маҳаллий аҳолининг мазмунли дам олишларини ташкил этиш мақсадида ташкил этилган фестивалда мамлакатимизда кашта ва сўзаначилик соҳасида фаолият юритаётган 200 дан ортиқ вакили ўз ҳудудларига хос либос ва амалий санъат намуналари билан фаол иштирок этишди.
Шунингдек, миллий қадрият ва анъаналаримиз шарафланадиган шодиёна доирасида миллий кураш мусобақаси, дорбоз ўйинлари, тош кўтариш, арқон тортиш ва бошқа халқ ўйинлари бўйича мусобақалар ўтказилиб, полвонларимиз ўз маҳоратини намойиш этди.
Фестиваль якунида энг яхши иштирокчи (ҳунармандлар) вилоят Туризм ва маданий мерос бош бошқармасининг диплом ва қимматбаҳо совғалари билан муносиб тақдирланди.
Шундан сўнг, барча тадбир иштирокчилари учун Ўзбекистон Давлат филармонияси "Наврўз" ашула ва рақс ансанбли томонидан томонидан концерт дастури тақдим этилди.